Pemeteh Guna Nampati - Prioritas Program Pelayanen GBKP Tahun 2020 ( Bahan PJJ 3 - 9 November )


Bahan Bimbingen Perpulungen Jabu-Jabu 3 - 9 November 2019
Pemeteh Guna Nampati
Prioritas Program Pelayanen GBKP Tahun 2020

Ogen : Keluaren 2:1-4

GBKP ndalani Tahun Pelayanen "Meningkatkan kemampuan warga GBKP dalam pengelolaan informasi dan keterampilan dalam penggunaan teknologi informasi." I bas Wikipedia erti teknologi ibanna eme Keseluruhan sarana untuk menyediakan barang-barang yang diperlukan bagi kelangsungan dan kenyamanan hidup manusia. Tahun pelayanen sierkawiten ras teknologi ncidahken maka labo tersirangken perkembangen jaman ras perkembangen gereja. I bas kinatana pe si idah maka labo tersirangken dirinta ras pemaken teknologi, salah sadana teknologi informasi. I bas sada data si oge kami maka si make telepon seluler ( ponsel ) i bas negaranta 371,4 juta. Jadi, angkana sekitar 142 persen, rata-rata 1,4 telepon seluler per kalak. I bas data si deban maka kita peringkat si peempatken si make alat informasi i doni enda. Data enda nuduhkenca uga kinata perkembangen masyarakat make salah sada alat teknologi informasi, janah uga ka gerejata tutus nikapken kerina ngawan perpulungen payo ngantusi ras make teknologi informasi enda.

Rikutken bahan renungenta ituriken maka Raja Mesir erndele ate ngidah reh teremna kalak Heber i Mesir. Teremna kalak Heber enda enggo iakapna ancamen man bana. Mbiar ia di kune sada paksa erperang ras kalak Jahudi enda talu ia. Emaka erbage dalan si ibanna guna ngambati gelah ula reh teremna kalak Heber. Pemena isuruhna kerja paksa alu mereken dahin si mberat. Kinatana maka reh kelekna ia i tindas reh teremna ka bilangen kalak enda. Jenari iperentahken Raja Mesir bidan Siprah ras Puah, adi tubuh anak dilaki i bas kalak Heber gelah i bunuh. Erkiteken mbiar bidan-bidan man Dibata maka la dalankenna perintah Raja Mesir. Kedungenna ipedarat raja perentah man kerina rayatna nina, "Ambekkenlah kerina anak dilaki bangsa Heber si mbaru tubuh ku Lau Nil, tapi kerina anak diberu pelepas nggeluh.

Sanga tubuh Musa, sempat ibuniken nandena telu bulan dekahna. Tapi enggo kenca Ianai akapna terbunikenca maka kedungenna ibanna sada usaha. lban nande anak e sada keranjang i bas batang rengo nari, jenari ilapisina alu damar gelah ola ku bas lau. Itamakenna anakna ku bas keranjang e, jenari icibalkenna i tengah-tengah dukut si mbages i tepi Lau Nil. I dauh-dauh nari tedis turang anak e ngenehen tah kai kari jadi man bana. Sada usaha silakoken nandena make pemeteh ras bahan-bahan si lit i bas paksa e jadi sada alat guna keselamaten anakna. Usaha enda banci ikataken sada teknologi adi si nin mulihi erti teknologi bagi isingetken i datas. Teknologi informasi si iban manusia eme guna nampati manusia i bas erbage curak komunikasi si perluken. Subuk arah internet, media massa, media sosial ras sidebanna. Kerina teknologi enda si enteremna makesa eme telepon seluler ( ponsel ). Tuhu-tuhu adi sipake alu payo kerina teknologi enda nampati kegeluhenta. Kai si iperluken banci alu sada alat saja enggo terjabab kerina. Perlu informasi politik, cuaca, erga-erga barang enggo lit asal si pake. Pengirimen berita arah sms, WA, email, gambar, video, transfer duit kerina cukup arah telepon seluler. Ije pe enggo banci si litken Kitab Ende-Endeta, Pustaka Si Badia, Tafsiren Alkitab ras lagu-lagu Rohani. I bas kota mbelin nampati kita gelah ula papak i bas dalan silanglangna enggo pitu aplikasi eme : Google Maps, Waze-GPS, Navigator, GPS Driving Rute, GPS Rute Finder, Yandex Navigator, GPS Essentials.

I bas dampar si deban maka melala pemaken Teknologi informasi umpamana arah "ponsel" alu la payo. Nehken berita si la tuhu (Hoax), nehken kata-kata si peturah nembeh ate ras perubaten, mpebelang kesalahen entah kekurangen kalak si deban arah statusta i bas FB, nipu kalak si deban ras sidebanna. Bage pe banci ibanna lanai kita beluh make waktu alu mehuli. I bas penelitian maka kalak Indonesia rata-rata telu jam make "ponsel" teptep wari. Jenari i bas kita pulung ras keluarga entah teman banci lanai kita ercakap tapi enggo sibuk ngenen "ponsel" na sekalak-sekalak. Teknologi informasi arus mehuli si siksiki, gelah ula salah pagi, hati-hati make jari-jari, salah nelduki banci kalak si ngoge nungkalisi, piah lanai tersaroi, dungna geluhta kerina rate mesui.

Tema mpersingeti kita mulihi gelah tuhu-tuhu payo min pemaken pemeteh si lit i bas kita. Teknologi informasi si idat arah pemeteh si pake guna nampati kiniulin kegeluhenta. Banci si pake guna erbinaga, mpeseh Berita si Meriah, erban data base, sistim informasi jemaat si terpadu, nehken kata-kata motivasi, tips-tips kesehaten, janah man kurangen encidah-cidahken dirinta ras pencitraan dirinta. Arah kerina si ban kita rukur kita rusur, ermulia Dibata entah lang. Adi labo IA ermulia la padah si ban. Tapi adi guna kemulian Dibata lakokenlah.

EVALUASI :
Enggo nge lit siaturken penampat nandangi unit pelayanan diakonia bas gerejanta?

DISKUSI :
  1. Kai-kai saja nge siakap si tama ngaruh ( positif ) ras kai-kai ka si maba kecedan ( negatif ) i bas kita make lnformasi Teknologi?
  2. Turiken pengalamenndu i bas makeken Informasi Teknologi!
AKSI :
Kirimken ayat-ayat entah renungen Kata Dibata arah sms, WA entah FB si mereken motivasi man temanta.

USULEN LAGU : 
  1. KEE GBKP No. 339 : 1-3 
  2. KEE GBKP No. 255 : 1-2
  3. KEE GBKP No. 217 : 1-2
  4. KEE GBKP No. 293 : 1-3  
TOPIK PERTOTON SYAFAAT
  1. Gelah Gerejanta banci tetap paguh i bas dahin pelayanen.
  2. Gelah kita ras anak-anakta payo make kerina teknologi jaman enda.
  3. Gelah pemerintah reh paguhna ngepkep kerina rakyat Indonesia enda. 

Pdt. Yunus Bangun, M.Th.


0 Response to "Pemeteh Guna Nampati - Prioritas Program Pelayanen GBKP Tahun 2020 ( Bahan PJJ 3 - 9 November )"

Post a Comment

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel