Ahli Bas Bidangna - Ulih: Ahli I Bas Bidangna ( Bahan PA Moria 27 Oktober - 2 November )


Bahan Bimbingen PA Moria 27 Oktober - 2 November 2019
Ulih: Ahli I Bas Bidangna





SI MAN OGEN : Perbahanen Rasul-rasul 18:1-4

Paulus i Korinti
1. Kenca bage itadingken Paulus kuta Aten janah lawes ia ku Korinti.
2. I Korinti jumpa ia ras sekalak Jahudi gelarna si Akuila, asalna i Propinsi Pontus nari. Langa ndekahsa ia reh i Italia nari ras ndeharana Persila. Pindah ia ku Korinti i Italia nari sabap kerina kalak Jahudi ipelawes Klaudius, Kaisar Roma, i Roma nari. Idahi Paulus kalak enda ndai.
3. Janah perbahan seri pendahinna, e me erbahan tenda, e maka i rumahna Paulus kesilang.
4. Tep-tep wari sabat kalak Jahudi, ngerana Paulus i bas rumah pertoton. IAjarina kalak Jahudi ras kalak Junani gelah tek man Jesus.

TEMA : AHLI BAS BIDANGN

TUJUN : Gelah Moria:

  • Ngidah keahlin Akuila ras Persila.
  • Nggit makeken ras ngembangken keahlinna i japa pe ia tading.

METODE PA : Sharing bagi keahlin masing-masing.

Kata Penaruh.  
Keahlian asal kata "ahli" ertina `mahir' ntah pe memiliki kepandaian, kemahiran, profesional, menguasai i bas sada bidang ilmu. I bas era globalisasi enda si eteh maka ilmu pengetahuan ras teknologi erkembang alu luar biasa. Lanai saja bias terjeng lit ijasah ras gelar akademik tapi si perlu genduari ningkatken keahlin i bas ngaturken bidangna. Pentingna keahlin i bas kegeluhen enda labo terjeng jadi pemake ( konsumen ) tapi arah keahlin si lit banci jadi penentu i bas bidang si ikuasaina. Gelah banci jadi kalak si ahli i bas bidangna arus fokus ku bas si ikuasaina, terus erlajar, ngasup ngidah maka kesalahen jadi ingan erlajar guna ningkatken kengasupen si lit janah makekenca gelah reh trampilna i bas pendahin i ja pe ia tading.

Mpebagesi Pengangkan Kerna Ogen. 
Korinti eme kota perdagangen si cukup terberita kerna kebayaken, budayana, kemakmuran rayatna. Enda jadi erkiteken pedagang si reh ras si lawes melala maba keuntungen. Tapi, lagu langkah pe i je melala lanai mehuli, umpamana erlua-lua. Paulus reh i Aten nari ku Korinti sabap i jah ia kurang iergai kalak i bas meritaken Berita Si Meriah. Paulus sekalak rasul si tutus erdahin i bas meritaken Berita Si Meriah tapi prinsipna la nggit mberati perpulungen i bas erberita alu mindo upah. Paulus kalak si terpelajar, keahlinna eme pengrajin tenda, si ipake guna keperlun serdadu-serdadu ras permakan. I bas kalak Jahudi erbinaga dahin si la asing sabap kerina ngajari anakna gelah itehna erdahin bage pe beluh erbinaga. Adi anak la iajari erdahin bali ras ngajari anak jadi pinangko. I bas kegeluhen kalak Jahudi erbinaga eme dahin si biasa idalankenna tapi arus ilakoken alu bujur. Paulus trampil i bas erbahan tenda guna idayaken si jadi penghasilenna erkiteken keahlinna e la pernah bene janah ilakokenna ijapa pe. I Korinti Paulus jumpa ras Akuila si asalna i provinsi Pontus nari, ia lenga ndekahsa reh i Italia nari ras ndeharana Persila, erkiteken lit perintah i bas kaisar Klaudius maka kerina kalak Jahudi si labo warga negara Roma arus ipelawes. Kalak Jahudi ianggap pemerintah Roma nggejeki (maba huru-hara), nggejeki erkiteken maba berita kerna Kristus, erbahanca maka kalak Kristen pe ngalaken perbeben si mberat i bas kalak Roma nari.

Akuila mulih ku Korinti alu la maba kai pe. I Korinti ibenaken Akuila ka me usahana bagi si ilakokenna i Roma ndube. Lit kearun ate i bas ia erkiteken i Roma ndube nggo sempat mbelin kal usahana tapi enda ibenakenna ka i bas si kitik nari. I bas perjumpanna ras Paulus, mehuli jadina erkiteken pendahinna si seri eme erbahan tenda. I bas hubungen pendahin e banci radu ras mere keuntungen pekepar. Paulus ikut nampati erbahan tenda janah Akuila me si ndayakensa. Usaha Akuila banci reh majuna, Paulus pe tercukupi keperlunna i bas meritaken Berita Si Meriah janah ia pe banci kesilang i rumah Akuila. Dahin si utama pe la tading eme tep-tep wari sabat ia tetap ngajari kalak Jahudi bagepe kalak Junani gelah tek man Jesus. Arah litna hubungen kerja sama antara Paulus ras Akuila teridah i je jiwa kewirausahan mbangun sada usaha si mbaru arah keahlin i bas bidang si ikuasaina, alu la mela, tutus ras radu mereken keuntungan. La cian ate ras persaingen si jadi tapi kerjasama ( bersinergi ). Kalak si erkiniteken ras lit keahlianna tetap rukur alu positif, la nukah nerah tapi tetap tek lit peluang si banci maba dalan pulah. Bage me Paulus ras Akuila ngasup ngembangken kerjasamana si mehuli, lit siteken, subuk i bas usaha perbinaganna bage pe ras-ras ka ia si sampaten i bas nehken Berita Si Meriah.

Pengkenaina. 
Enterem jelma ngatakenca maka kai pe itehna, tapi la lit keahlinna, la itutusina ku bas sada bidang seh maka pemetehna e tanggung la jadi kalak si ahli. Pemetehna e terjeng erguna man dirina saja, la igali ntah ikembangkenna seh maka la jadi peluang guna mbangun ras ngembangken diri bage pe ndatken keuntungen. Si enda banci jadi erkiteken kurang percaya diri, rukur negatip, mbiar la rulih emaka ngadi lenga benaken. Lit ka deba ia ahli ka bas bidangna tapi la ngasup mbangun relasi entah hubungen kerjasama ras kalak sideban. Lit perukuren si kurang tek nandangi kalak si deban, iakapna kalak. mpergunaken ia, lit sifat cian, aku si erpemeteh ia pe dat untung, terlebih i bas kalak Karo lit kuan-kuan pemain tunggal, adi bage biak lit pe keahlinta, labo banci maju, kita tetap talu ersaing, erkiteken tetap nge gegehen ras rasil adi lit jaringan kerja asangken secara tunggal.

Bage me i bas tahun enda gerejanta nekanken kerna 'Entrepreneurship' eme kerna jiwa kewirausahan, nciptaken ide-ide si unik njadiken sada hal si mbaru arah keahlinta si berbeda ras kai si enggo lit gunana eme idayaken. Arah enda ituntut kita jadi kalak si kreatif, rukur positip, mejingkat, tetap nggit erlajar nambahi pemeteh si lit bas kita guna jadi sada keahlin. Kita pe arus jadi kalak si paguh, la permela, la nukah nerah, la mbiar gagal erkiteken ngasup ngidah kegagalen e jadi sada pelajaren si meherga guna kesuksesen i bas masa depan. Janah si penting arus terbuka nangdangi kalak si deban, erbahan jaringan kerja, guna banci ngembangken keahlinta jadi sada usaha si banci maba keuntungen pekepar, bagi si lakoken Paulus ras Akuila. I bas kai pe adi ahli kita bas bidangta ras nggit kita makekenca i ja pe kita tading la kita mbiar, sabap keahlinta erbahan kita tetap erkreasi, menghasilken sada hal si mbaru. Uga pe majuna jaman enda terikuti kita sabap keahlinta e banci mereken ide-ide si mbaru, terlebih i bas makeken teknologi si lit guna maba ulih si terulin. Ertina i bas kewirausahan enda arus lit keahlianta, lit jaringen kerja, lit pemasaren guna mpeturah keuntungen. Jadilah ahli i bas bidangta amin kitik gia banci mbuka jaringen kerja man kalak sideban, usahanta pe reh majuna. Ula mbiar tutusi amin kitik gia sabap keahlin e bagi 'emas si ndabuh i bas kubang' gia melket tapi labo urak ergana. Jadilah Moria si lit keahlinna guna banci ipakeken.

Sharing Berbagi Keahlian Masing-masing 
Cuba sharingkenndu keahlianndu man temanndu si banci maba ulih man kerina peserta PA (obat-obatan, makanan, kerajinan tangan dll).
Tips Obat qatal /kutu air.

  • Belerang sebesar kemiri.
  • Akar tuba jenuh 3 batang sepanjang 10 cm ( ada di penjual rempah Karo)
  • Minyak kelapa secukupnya.

Cara Membuatnva. 
Kikis belerang ke suatu wadah yang bisa di masak, kikis juga akar tuba jenuhnya, masukkan minyak kelapa/minyak goreng, lalu masak sampai mendidih dengan api kecil. Angkat, hangat-hangat kuku di oleskan pada daerah yang gatal.


Pdt. Misalta Kaban, STh.


0 Response to "Ahli Bas Bidangna - Ulih: Ahli I Bas Bidangna ( Bahan PA Moria 27 Oktober - 2 November )"

Post a Comment

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel