Jabu Si Erusaha - Menumbuhkembangkan Jiwa Entrepreneurship ( Bahan Bimbingen PA Moria 8 - 14 September 2019 )


Bahan Bimbingen PA Moria 8 - 14 September 2019
Menumbuhkembangkan Jiwa Entrepreneurship

SI MAN OGEN : 1 Kronika 4:21-23
Kesusuren Sela
21. Sela e me anak Juda. Kesusurenna e me i Er, si manteki kuta Leka; Laada si manteki kuta Maresa; terpuk tukang tenun uis lenen, si ringan i kuta Bet Asbea;
22. Jokim ras kalak si ringan i kuta Koseba; ras Joas ras Sarap, si ngempoi beru Moap jenari ringan ia i Betlehem. (Adat enda enggo seh kal tuana.)
23. Kalak enda tukang kudin, suruh-suruhen raja, janah ringan i kuta Netain ras Gedera.
TEMA : JABU SI ER-USAH

T U J U N : Gelah Moria:
  1. Ngidah kesusuren Sela enggo menaken piga-piga bentuk usaha.
  2. Nggit ngukuri bentuk-bentuk usaha si genduari ras nggit ngelakokenca.
METODE PA : Aksi Nyata Demonstrasi Home Industri / Nobar.

Kata Penaruh.
Paksa si genduari enda megati lit ibelasken perlu mpeturah ras mpebelin jiwa kewirausahan. Si imaksudken ku bas jiwa kewirausahan ( entrepreunership ) eme: "perubahen, kreatif, inovasi, melihat dan menangkap peluang, berani menanggung resiko." Jadi labo ngerana soal bisnis saja tapi "cara rukur ( mindset ) karakter, mental, keahlian ( skill ) ras moral. Emaka jiwa kewirausahan ( entrepreunership ) ngkenai kerina pribadi jelma termasuk jabu-jabu. Jiwa er-usaha ntah wirausaha labo i dat alu meter ( instan ). Modal utama i bas er-usaha eme penjemba i bas dirinta nari, pang erpasang ( ngataken resiko ), tutus i bas ndalanken usaha seh njadiken pengusaha si tangguh ras la murah putus asa. Enda kerina banci tersehi adi jiwa entrepreneur ibenai mulai kin kitik-kitik nari ( usia dini ). Tentuna i jenda peran keluarga me si mbelinna sabap keluarga eme pendidik si pemena ras utama man anak. Mulai kitik-kitik nari eme masa si tuhu penting i bas pembentuken bas kegeluhen anak ku masa si reh. Perlu kal si suanken nilai-nilai moral agama ( kiniteken ), si njemba ia gelah nggit erlajar seh maka lit Pengarapenna jadi kalak sukses.

Mpebagesi Pengangkan Kerna Oqen.
Kenca bangsa Jahudi mulih i bas pembuangan nari, menam lanai itandai kalak ia selaku bangsa Dibata sabap enggo campur ia ras kalak si deban si mbelin kal mpengaruhi geluhna. Erkiteken sie ate kalak Jahudi lit min si tandana maka ia tuhu-tuhu kalak Jahudi, emaka penting meteh ise-ise saja si mulih i bas pembuangan nari. Emaka si jadi oratenta ncidahken suku ras kesusuren ise si mulih i bas pembuangen nari, bagepe ncidahken i ja ia tading ras latar belakang pendahinna. Salah sadana eme kesusuren Sela.

Jadi penungkunen man banta ise kin Sela e? Sela eme anak Juda si nguda, arah ndeharana Syua ( Jehuda eme anak Jakup ). Alu bage Sela bengket i bas terpuk Juda. Perlu si eteh suku Juda lit 690 keluarga ( 1 Kronika 9:5 ). Lit enem anak Sela eme Er si mateki kuta Leka. Laada si manteki kuta Maresa. Terpuk tukang tenun uis lenen si ringan i kuta Bet Asbea. Jokim si ringan i kuta Kosebea. Joas ras Sarap ringan i Betlehem. Erkiteken ia duana suruh-suruhen raja maka duana tading ia i kuta Natain ras Gedera. Si idah i jenda dua anak Sela lit pendahinna si khusus ( profesi usaha ) eme terpuk tukang tenun uis lenen ras si Joas ras Sarap pendahinna e, eme tukang kudin. Amin gia sada keluarga, tapi i bas ngidah peluang bisnis, anak-anak Sela erbahan usaha si banci ipake kalak si nterem ( umum )  eme tukang tenun uis lenen ras kudin. Amin gia uis lenen meherga, tapi erkiteken melala si perlu, emaka uis lenen enda tuhu-tuhu laris dingen mbue lakona. Uis lenen enda ipake guna kire-kire Rumah Pertoton ( Kel 26:31 ), bagepe jubah si nutupi baju Epod ( Kel. 28:31 ). Baju epod enda eme baju imam. Si Joas ras Sarap tukang kudin. Erkiteken kualitas kudinna mejile maka ia duana jadi suruh-suruhen raja. Bage me i bas jamanna, i bas Pustaka pe lit ituriken kerna talenta ras usaha si lit i bas kegeluhen erbangsa ras ermasyarakat. Ekiteken arah pendahinta erguna man kalak si enterem.

Pengkenaina. 
Manusia itepa Dibata rikutken tempasNa, iberekenNa gegeh ras kengasupen guna erdahin bagepe erusaha ( band. Kejadin 2: 15 ). Enda me dungna si erbanca tep-tep manusia arus erdahin ras er-usaha guna ncukupken keperlun geluhna ras njemba manusia njadiken kegeluhen si harmonis alu njaga keutuhen tinepa Dibata. Kai kin si iusahai ras si idahiken manusia? Situhuna enggo isikapken Dibata man manusia arah kerina isi doni enda. Pengusaha si pemena bas doni enda eme Adam ras Hawa. Keluarga enda me si pemenana erdahin i bas Peken Eden. Dibata pe mereken gegeh, perukuren ras kepentaren man manusia guna er-usaha ras erdahin. Bagepe arah bahan PA-nta sendah erlajar kita arah kesusuren Sela i bas jamanna eme selaku tukang tenun uis lenen bagepe tukang si erbahan kudin. Emaka nggo jelas man banta Moria maka Tuhan ndilo kita erdahin ras er-usaha. I bas jamanta si genduari biaya nggeluh reh belinna, emaka mehuli sekalak ndehara ikut ngukuri kai kin si banci ilakoken guna ncukupken keperlun jabu. Banci jadi ngelitken nakan saja enggo tercukupi tapi guna ndatken ingan tading si metunggung, biaya anak sekolah, perlu ilitken tambahenna ras biaya

pertambar adi kune kita sakit. Emaka ula kita mela ndahiken sada-sada dahin ntah usaha si banci e nampati perbeliten jabu. Ngasup min kita ngidah peluang i sekelewetta kai kin si iperluken kalak si enterem si banci rikutken pemetehta ras nggit kita mpelajarisa, gelah kita banci erusaha. Selaku Moria adi kita nggit erdahin ras rusaha alu tutus, umpamana siban sada-sada pangan, situtusi erbanca seh maka nanamna pe ntabeh. Tupung PA banci e siban jadi snackna, si pindo man teman-temanta pendapatna. Adi ntabeh banci mulai si dayaken ku teman-temanta, dingen terus erlajar gelah reh ulina. Ntahsa erbahan erbage aksesoris arah bahan-bahan si lit i sekelewetta, 'ndaur ulang sampah'. Sabap i bas jaman si genduari enda masyarakatta enggo nterem lanai make aksesoris emas tapi si unik ras etnik. Ertina kita iajuk maka pentar ngidah ras makeken peluang si lit alu kreatif. I bas sie kerina ula lupa pindo kepentaren ras pasu-pasu bas Dibata nari.

Aksi Nyata Demonstrasi Home Indusri
  1. Banci idilo sekalak si ngajari Moria erbahan demo memasak, ntah erbahan ketrampilan menjahit, mempayet, membordir ras sidebanna sue ras inganta tading.
  2. Turiken peluang ras kreatifitas si arus silakoken i bas Morianta ( adi la ilakoken aksi ).
Resep Bolu Jambe

Bahan :
  • 250 gr jambe kuning di kukus dan di haluskan
  • 100 gr mentega yang sudah di cairkan
  • 3 butir telur
  • 120 gr gula pasir
  • 150 gr tepung terigu
  • 100 ml air santan
  • 1 st TBM
Cara membuatnya:
  • Di mixer telur + gula + TBM sampai sampai mengembang
  • Kemudian masukkan labu dan aduk sampai tercampur rata
  • Kemudian masukkan tepung terigu + mentega yang di cairkan dan air santan. Aduk sampai semua bahan tercampur rata. 
  • Setelah semua bahan tercampur rata, masukkan ke dalam Loyang yang sudah di olesi mentega dan di tabur tepung supaya tidak lengket. Kemudian panggang selama 35 menit
  • Selamat mencoba...

Pdt. Agustina br. Perangin-angin S.TH, MPsi

Film Bahan PA Moria : Industri Kreatif - Sampah itu Realita saatnya ubah jadi berkah




0 Response to "Jabu Si Erusaha - Menumbuhkembangkan Jiwa Entrepreneurship ( Bahan Bimbingen PA Moria 8 - 14 September 2019 )"

Post a Comment

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel