Siagengen Radu Mbiring, Sikuningen Radu Megersing - HUT RI ( Hidup Damai Dalam Kemajemukan ) Bahan PA Permata 11 - 17 Agustus 2019


Bahan Bimbingan PA Permata 11 Agustus 2019 - 17 Agustus 2019
HUT Republik Indonesia
( Hidup Damai Dalam Kemajemukan )


Nas : 1 Korinti 12 : 12 - 25
Melala ringring, tapi kula sada nge
12. Bagi sada kula melala ringringna, bage me Kristus e. Amin gia melala ringring e, tapi sada kula nge.
13. Bage me pe kita kerina, subuk kalak Jahudi bage pe kalak Junani, subuk budak bage pe kalak si bebas, enggo iperidiken alu Kesah si sada e ku bas sada kula. Ibahan Dibata maka kerina kita enggo minem Kesah si sada e.
14. Sabap kula e jadina labo i bas sada ringring nari ngenca tapi jadina i bas melala ringring nari.
15. Adi nina nahe, “Erkiteken aku labo tan, e maka aku labo atan i bas kula,” maka labo e erbahanca nahe e la atan i bas kula e.
16. Bage pe adi nina cuping, “Erkiteken aku labo mata, e maka aku labo atan i bas kula,” maka labo si e erbahanca mata e la atan i bas kula e.
17. Bicara kerina kula e jadi mata, kuga nge nina megi? Janah bicara kerina kula e cuping, kuga nge nina nganggeh?
18. Tapi si tuhuna, Dibata namaken ringring e sada-sadai i bas kula e sue ras si mehuli iakap Dibata.
19. Adi kerinana sada erbage saja ngenca, ma la lit kula?
20. Tuhu, melala ringring, tapi kula sada nge.
21. E maka labo banci nina mata man tan, “Aku la perlu kam!” Bage pe labo banci nina takal man nahe, “Aku la perlu kam!”
22. Tapi sebalikna, ringring si tempa-tempa la megegeh e, e nge si la banci langna.
23. Ringring si la meherga siakap i bas kula, si e me si lebih sipehaga; janah ringring si mehangke encidahkenca, si e nge si lebih siuisi alu mehuli.
24. Tapi ringring si labo mehangke encidahkenca labo perlu siuisi.
Dibata enggo ngaturken kula alu serasi, seh maka ringring si kurang meherga lebih iergaken.
25. Gelah kula e la erbelah-belah, tapi sada-sadai ringring e radu seri mperdiateken ringring si deban.
Tema : "Siagengen Radu Mbiring, Sikuningen Radu Megersing"

Gelah PERMATA GBKP:
  1. Ngangkai kerna kinierbagen e me pemere Dibata erpalasken Nas
  2. Muat Bagin guna mpertahanken ras mengisi kemerdekaan RI alu aksi nyat
Metode: Aksi 

I. BENA KATA 
Surat Rasul Paulus si pemena man Perpulungen Korinti merupakan jawaben nandangi situasi perpulungen si enggo terpecah i bas erbage-bage kelompok. Lit singataken : "Aku arah Paulus", lit singataken : "Aku arah Apolos", deba arah Petrus, li ka si ngataken : "Aku arah Kristus" ( 1 Kor 1 : 12 ). Alu litna kelompok-kelompok enda erbahanca ngawan ni perpulungen Korinti enggo si maba-maba randana. Masing-masing kelompok nekanken pengangkan kelompokna i bas ngertiken sada-sada hal menyangkut kegeluhen kiniteken ngawan ni perpulungen. I bas nas 1 Kor 12 : 12 -25, si jadi nas PA nta, Rasul Paulus empersingeti ngawan ni perpulungen uga arus nggeluh i bas kinierbagen ( kemajemukan ) pemere ( talenta ) si ibereken Dibata man setiap kalak i bas perpulungen.

II. ISI 
1 Korinti 12 : 12 - 25 i bas konteks besar 1 Korinti 12-14 si nuriken kerna Pemere-Pemere Kesah ( Karunia-Karunia Roh ). I bas konteks kecilna lit i bas 1 Korinti 12 : 1 - 31, sinuriken kerna pemaken Pemere-Pemere Kesah e. Pemakenna nina Rasul Paulus arus rusur encidahken bana maka Kristus nge si erkuasa, labo manusia. Janah adi igunaken i lebe-lebe jelma si enterem, arus alu cara si erbahan "tertib, ratur", labo erbahan kekacauan / perubaten / erpihak-pihak / erkelompok-kelompok ( 1 Kor. 14 : 27 - 28; 33,40 ). Memang lit pemere-pemere si luar biasa, menakjubkan ( 1 Kor. 12 : 10 ), tapi si pentingna e ndalanken kekelengen ( 1 Kor. 13 : 1 - 2; bd 1 Kor. 13 : 8, 13).

Kepeken i bas Perpulungen Korinti enggo turah "persaingen" pemaken "Pemere-Pemere Kesah" ( 1 Kor. 12 : 4 - 6 ), si erbahanca Perpulungen e ceda / erpihak-pihak / erkelompok-kelompok ( 1 Kor. 1 : 12 - 13 ). Situhuna la mungkin lit kelompok-kelompok si erpengakap maka kelompokna si benar / hebat, sebab kerina Kula Kristus ( 1 Kor. 12 : 27 ), sada nge Kristus, sada nge Kesah, si la banci ibagi-bagi / la banci ipecah-pecah. Sada nge si mereken "pemere-pemere" e ( 1 Kor. 12 : 4 ). Pemere-pemere e labo guna persaingen, si erbahan lit si cian-cianen, labo guna kebayaken sesekalak, tapi guna kerinana ( 1 Kor.12 : 7 ). Kinierbagen "Pemere-Pemere Kesah" arus igunaken guna mbangun / majekken Kula Kristus (1 Kor.14 : 26).

Kinierbagen pemere-pemere e me guna kiniersadan i bas Kristus ( Kula Kristus ). Kula melala ringringna, janah kinierbagen ringring erfungsi guna persadan kula. Pemere-pemere ipakeken guna ngelai si deban, labo guna kesombongen ntah penonjolen diri. Dibata enggo ngaturken ringring i bas kula ndahiken dahinna radu ras ( bersama-sama ), ras saling membutuhken sada ras si debanna, ras radu ras ngenanami ulih pendahin masing-masing ringring ( senang iakap kula ). Bage me sebalikna, adi sada ringring suin, kerina rate mesui. jadi labo sada ring mbangun sada kula, tapi kerina ringring mbangun / majekken Kula Kristus ( 1 Kor. 12:25 - 26 ).

III. PENGKENAINA 
Kerina manusia labo lit si seri: lit mbestang, lit kertang; li megersing, lit mbiring; lit bayak, Iit musil; lit perpangkat, lit buruh / karyawan; lit guru, perbinaga, perjuma, cendikiawan, rsd. Ngkai maka la seri? Lit si ngatakenca: "la seri pengindo, la seri kesempaten". Payo nge? Lang. Kerina bekas pengaturken Dibata ( Karunia Roh - Pemere Dibata ). Lit ka kalak si ngataken erkiteken la seri kerina me peturah: "meganjang rukur, sok pamer, sok hebat, egois", rsd. Payo nge? Payo. Tapi labo bage sura-sura Dibata. AIu pelain-lain, i je me manusia saling membutuhken guna kiniulin nggeluh, ermulia Dibata. Kita e me Kula Kristus, janah Kristus kap Takal, kita si enterem ( pelain-lain ) e me KulaNa.

Nas 1 Korinti 12 : 12 - 25 jadi bahan PA PERMATA GBKP i bas rangka emperingeti HUT RI pe 74 ken. Nas enda banci jadi palas / motivasi PERMATA GBKP i bas hidup bernegara, bage pe jadi Generasi Penerus Negara Kesatuan Republik Indonesia (NKRI). Negara enda pajek erkiteken perjuangen kerina anak bangsa "dari Sabang sampai Merauke, si lebih terasa kenca "Sumpah Pemuda" nina:
a. ....Berbangsa satu Bangsa Indonesia.
b. .... Bertanah air satu Tanah Air Indonesia.
c. ......Berbahasa satu Bahasa Indonesia. 

Negara RI iperjuangken / ipajekken kerina suku-suku bangsa Indonesia, i bas kerina golongen ( suku, agama ). Suku-suku bangsa ersada majekken NKRI enda i bas kemajemuken bangsa nari. Kita ersada i bas kinierbagen ( Bhineka Tunggal Ika ).

Semangat si rehna i bas Kesah si Badia ( Holly Spirit ) la banci la lit i bas Sekalak PERMATA GBKP, Kesah si Badia si empersadaken i bas kinierbagen. PERMATA GBKP si jadi bagin bangsa enda ( Pemuda Indonesia ), alu ngaloken "Pemere-Pemere Kesah", la banci la tetap njemak Sumpah Pemuda, si enggo iikrarken Pemuda Indonesia tahun 1928, seh lahir NKRI tanggal 17 Agustus 1945 ndube. E maka setiap kali irayaken HUT RI, PERMATA GBKP ertekad tetap njaga kemajemukan-anak bangsa enda gelah tetap utuh NKRI enda. Kinierbagen labo njadiken bangsa enda runtuh, tapi kinierbagen erguna njaga Persatuan Indonesia ( salah sada dasar negara enda salah sada sila ibas Pancasila - dasar negara RI enda). Selaku "ringring" i bas "Kula Indonesia" enda, PERMATA GBKP arus ikut muat bagin guna empertahanken keutuhan / kejayaan NKRI enda. Musuh bersama jaman enda i tengah-tengah bangsanta e me Gerakan-Gerakan: "Intoleran, radikalis, teroris". Perkuat kebersamaan anak bangsa ( ikut pe PERMATA GBKP ) empertahanken NKRI si berdasarkan Pancasila ras UUD 1945. PERMATA GBKP si merupakan bagin Pemuda Indonesia ertanggungjawab mengisi Kemerdekaan Indonesia alu "Pemere-Pemere Kesah", alu talenta si pelain-lain si ibereken Dibata. I bas kinierbagen anak bangsa, mari saling memperkuat bangsa : "Bersatu kita teguh, bercerai kita rubuh", "Siagengen radu mbiring, sikuningen radu megersing". Dirgahayu HUT RI ke 74".

IV. AKSI 
PERMATA GBKP erbahan aksi "Penghijauan" ntahpe aksi "Gotong royong kebersihan lingkungan" alu melibatken/ngundang Pemuda antar Gereja, Pemuda lintas suku dan agama, ras kerina organisasi Pemuda ibas lingkungenna.

V. USULAN ENDE-ENDEN
  1. KEE 254 "Isuruh Dibata" 
  2. Sungguh Ku bangga Bapa 
  3. KEE 319 "Sada Soranta Muji Dibatanta"


Pdt Simon Tarigan S.Th.


0 Response to "Siagengen Radu Mbiring, Sikuningen Radu Megersing - HUT RI ( Hidup Damai Dalam Kemajemukan ) Bahan PA Permata 11 - 17 Agustus 2019"

Post a Comment

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel