Ibebasken Guna Mbebasken - HUT Kemerdekan RI 74 Tahun ( Bahan PJJ 11 - 17 Agustus 2019 )


Bahan Bimbingen Perpulungen Jabu-Jabu 11 - 17 Agustus 2019
Ibebasken Guna Mbebasken
( HUT Kemerdekan RI 74 Tahun )

Ogen : Matius 18:23-35
23. Sabap Kinirajan Surga bali kap ras sekalak raja si erkira atena ras juak-juakna.
24. Kenca ibenakenna perkiran e, isuruhna ngadap sekalak juak-juak si rutang erjuta-juta.
25. Tapi perbahan la ia ngasup nggalari utangna e, e maka isuruh raja gelah ia ndayaken dirina ras ndeharana bage pe anak-anakna bage ka pe kerina erta-ertana guna nggalari utangna e.
26. Tapi erjimpuh juak-juak e i lebe-lebe raja, jenari nina, ‘Sabar kam nimaisa tuan, kugalari nge pagi utangku e kerina.’
27. Mekuah ate raja e, e maka isasapkenna utang juak-juak e jenari isuruhna mulih.
28. Asum juak-juak e erdalan mulih, jumpa ia ras sekalak juak-juak si deban si rutang man bana piga-piga ribu. Itangkapna dingen icekakna temanna e, jenari nina, ‘Galari utangndu.’
29. Erjimpuh temanna e i lebe-lebena, jenari nina, ‘Sabar kam nimaisa teman, kugalari nge pagi utangku e kerina.’
30. Tapi la ia sabar; itamakenna temanna e ku bas penjara seh bali utangna.
31. Ngidah si enda ceda ate teman-temanna si deban, e maka ipesehna man tuanna.
32. E maka isuruh raja me juak-juak ndai ngadap, jenari nina, ‘Kam kalak jahat! Erkiteken pemindonndu, utangndu si bage buena enggo kusasapken.
33. Kam pe aturna mekuah atendu temanndu sapih juak-juak bagi mekuah ateku kam.’
34. Merawa-rawa kal raja e, jenari itamakenna juak-juak e ku bas penjara seh igalarina kerina utangna.”
35. Tole nina, “Bage ka nge ibahan BapangKu si i Surga man bandu kerina adi la kin ialemindu seninandu terus ku bas pusuhndu.”
Jesus Kristus nuriken kerna kinirajaan Dibata megati alu make perumpamaan. Salah sada perumpaman sinibahanNa eme kerna ngalemi. Ngalemi asal katana aphiemi i bas bahasa Indonesia iertiken: membiarkan pergi bebas, menutupi, menghapus, mengampuni, memulihkan hubungan baik antara dua pribadi yang sudah retak akibat kesalahan. Ngalemi kalak si deban labo perbahanen si mesunah ndalankenca. I bas oratenta Matius 18:23-35 enda icidahken man banta uga kecibal kalak si la nggit membebasken entah pe ngalemi salah kalak si deban.

I bas perumpaan enda ituriken kerna lit sekalak tuan si mbebasken juak-juakna i bas utangna nari. Juak-juak e la ngasup nggalari utangna emaka ipindoken juak-juak e gelah sabar tuan e nimai seh pagi banci igalarina utangna. Mekuah ate tuan e, ibebaskenna juak-juak e, isasapkenna utang juak-juak e jenari isuruhna mulih. Bageme juak-juak e ibebasken erkiteken perkuah ate tuan e, lebih asa siipindoken juak-juak e enggo ilakoken tuan e man bana. Tapi juak-juak e la bage perbahanenna man kalak si deban, la ia nggit nasapken utang kalak man bana, la mekuah atena tapi itamakenna ku penjara kalak si la ngasup nggalar utang na e. Ngidah sie merawa tuan ndai, idilona juak-juak si jahat e jenari itamakenna juak-juak e ku bas penjara seh tergalarina kerina utangna.

Arah perumpamaan enda teridah maka aminna nggo ialemi Dibata dosanta, enggo ibebaskenNa kita i bas dosa-dosanta tapi adi la kita nggit ngalemi salah kalak si deban maka sia sia nge kebebasen sinialoken kita e. Ise si enggo ngaloken pembebasen "pengalemi dosa" i bas Dibata nari arus ka ia nggit ngalemi salah kalak si deban. Emaka alemilah, bebaskenlah setiap kesalahan kalak si deban, sebab bage me arusna kegeluhen ajar-ajar Tuhan Jesus.

Bage pe adi itengah-tengah bangsanta enda, adi lit kalak si enggo ersalah umpamana, ngelakoken korupsi, diskriminasi, selaku kalak si enggo ialemi Tuhan, labo baginta guna numpahi ntah pe ncidah-ndicahken kesalahenna gelah mela iakapna. Tapi selaku anak-anak Dibata sitotoken gelah robah dingen jera ia. Jenari siarapken gelah lembaga hukum i tengah-tengah bangsanta ndalanken hukum alu payo. Ise si ersalah iukum erpalasken undang-undang si lit. Adi lanai lit korupsi ntah pe diskriminasi tentu reh ulina perdalanen bangsanta. Ipasu-pasu Tuhan nge bangsa si bujur dingen erpengarapen man baNa.

EVALUASI :
Enggo ilakoken aksi kebersihan nandangi peralaten inventaris gereja?

DISKUSI :  
  1. Kai nge sierbahanca maka mberat kel siakap ngalemi kalak si deban? Turikenlah ulihna adi la kita nggit ngalemi kalak si debanl
  2. Turikenlah kesalahan-kesalahan kai nge si iakapndu ibahanndu man kalak si deban seh maka hubungan si lit enggo jadi ceda / lanai mehuli. Adi enggo ietehndu nggit nge kam ndahi ia jenari mindo gelah ialemina? ( ola padah turiken kesalahen kalak man bandu, kesalahenndulah turiken ).

AKSI
Mulih PJJ enda, dahilah kalak sienggo sangkut ukurna ibahanndu jenari pindolah pembebasen i bas ia nari, janah adi reh kalak mindo pembebasan ( mindo maaf ) bebaskenlah ia, maafkenlah ia bagi si enggo ibahan tuan e bas perumpamaan Jesus. Adi la ia reh mindo pembebasan, tetaplah alemi ia bagi si ibahan Tuhan Jesus i kayu persilang nandangi kalak jahat, nina: 'alemilah ia kerina sebab la ietehna kai sinibahanna'.

USULEN LAGU : 
  1. KEE GBKP No. 360 iendeken 3 kali 
  2. KEE GBKP No. 269: 1-3
  3. KEE GBKP No. 362 : 1-3
  4. KEE GBKP No. 386 : 1-3  
TOPIK PERTOTON SYAFAAT 
  1. Notoken gelah ngawan perpulungen ngasup ngalemi kalak siersalah nandangi ia.
  2. Notoken gelah lit perdamen i doni enda.

Pdt. Sinta Ronauli Siahaan, S.Th.


0 Response to "Ibebasken Guna Mbebasken - HUT Kemerdekan RI 74 Tahun ( Bahan PJJ 11 - 17 Agustus 2019 )"

Post a Comment

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel