Hari Ulang Tahun Mamre GBKP - Ku Tandai Perbulangenku ( Bahan PA Moria 18 - 24 Agustus 2019 )


Bahan Bimbingen PA Moria 18 - 24 Agustus 2019
Hari Ulang Tahun Mamre GBKP

SI MAN OGEN : Kuan-kuanen 12: 1 - 4
1. Kalak si erngena ate man pemeteh mesikel ia ituriken kesalahenna,
kalak lenge la ngena atena ipandang.
2. Kalak bujur keleng ate TUHAN
tapi si jahat sura-surana, nembeh ateNa.
3. Kalak jahat labo lalap ia sikap,
tapi kalak bujur tetap me ia paguh.
4. Ndehara si mehuli, ia kap kemulian ras keriahen perbulangenna,
tapi ndehara si njuruken bali kap ia ras penakit kangker.
TEMA : KU TANDAI PERBULANGENKU

TUJUN : Gelah Moria:
  1. Meteh kuga ndehara si jadi kemulian ras keriahen man perbulangenna.
  2. Lebih nandai perbuiangenna alu bage banci ngkuhi keriahenna.
METODE PA : Nulisken biak perbulangen si mehuli.

Kata Penaruh. 
Kerina kalak si erjabu pasti sura-surana ersada arih ras bahagia i bas tengah jabu ras pasangenna. Kepeken perlu perjuangen nehi sura-sura e erkiteken mpersadaken si dua jadi sada labo menukah. Sabap duana e beda i bas latar belakang keluarga, didiken orangtua, tingkat pendidiken ras budaya. Guna sie me perlu kal perbulangen ras ndehara saling mperlengkapi. Sitandan la terjeng rupa saja tapi pe i bas kerina dampar kegeluhen. Alu nandai biak pasangen njadiken hubungen lebih sempabu ( harmonis ). Adi si tandai pasangenta lebih mbages maka kita ngasup mengagumi pasangenta arah kerina biak si lit i bas dirina jine. Seh maka ngasup kita berubah guna pasangenta. PA-nta sendah mabai kita lebih nandai perbulangenta. Sigargari arah bahan PA-nta enda.

Mpebagesi Pengangkan Kerna Ogen
Manusia ijadiken Dibata sentudu ras tempasNa emaka kerina si ndarat i bas babah manusia e nari lit kuasana. Kai pe sinibelasken lit hubungenna ras paksa si reh. Arah pengerana jelma banci mbangun masa depanna, banci ka sebalikna arah pengeranana jine ncedaken masa depanna. Emaka perlu kal nggargari dirinta, adi kalak si erngena ate man pemeteh mesikel ia ituriken kesalahenna, tapi kalak lenge la ngena atena ipandang. Guna si e penting kal metode si tepat guna mpeseh pengajaren, didiken gelah banci tetap iinget ras 'icintai'. Jadi labo terjeng ngajarken tapi pe ngasup mereken contoh. Labo minter kalak banci pentar, tapi lit proses si man dalanen, displin ras megenggeng gelah banci jadi kalak si bijaksana. Adi kal bas si bijak dingen pentar ngena atena pengajaren, bicara ipandang ia i bas kekurangenna la iakapna nokoh entah pe ijunguti sabap sie banci mpekena kegeluhenna dingen jadi kalak si lebih `sukses'. La bali ras kalak

si lenge "bebal" la iakapna cocok adi ia ipandang anem gia e mpekena dirina. Tupung Salomo lit bas puncak 'ketenaren', ipindona kepentaren man Tuhan gelah ngasup ia mbedaken apai si jahat ras apai si benar. Ipindona gegeh man Tuhan guna ngangkaisa. Teridah i bas tengah jabu maka kalak si bujur tetap keleng atena Tuhan. Adi keleng atena Tuhan maka kegeluhenna pe tetap erpalas man Tuhan. Ieteh Tuhan kerina tangkas seh ku bas pusuh si mbagesna. Adi kalak si nggejapken penjayamen Tuhan tetap nggejap maka kesuliten, tegoren jadi sada kemalemen ate man bana. Mbages kal pengertin sinikataken penulis Kuan-kuanen enda "kalak jahat labo lalap ia sikap, tapi kalak bujur tetap ia paguh. Alu tangkas iidahna maka kalak si jahat perbahanenna lit nge waktuna ndabuh sabap tetap ia iayak-ayak rasa bersalah si lit i bas pusuhna. Labo terbuniken sora pusuh, ula lupaken maka kalak si bujur tetap paguh erkiteken la lit si man kebiarenkenna, perbahanenna tetap la encurnaken ras aman geluhna erkiteken mehuli perbahanenna.

Gambaren sekalak ndehara si mehuli eme jadi kemulian man perbulangenna. Pengajaren e ermula i bas tengah jabu sebage unit si kitikna. Ndehara si mehuli, i bas pengerana, perbahanen ras perukurenna kerina mehuli, la lit si ukurkenna si jahat apai denga ka ilakokenna.

Pengkenaina.  
Genduari, kai dage teladan siniajarken kita man generasi penerus ras anak-anakta. Nandai biak kerina si lit i bas jabu, anak ras perbulangen, tentu kai siniajarken, e ka nge dungna turah i bas biak anak-anakta. Megati si jadi perayakenta nggeluh eme sukses tapi kenca kita enggo sukses megati kita lupa diri ras mbanggaken dirinta jine, nggejap maka kita si benarna, pendapatta ngenca si akap si payona, la kita merhat ngaloken nasehat kalak sideban. I bas Pustaka Si Badia banci si idah maka peran diberu melala kal nentuken kesuksesen jabuna. I bas Padan Si Ndekah: Hana, Abigail, Naomi, Rut ras Ester. I bas Padan Si Mbaru diberu-diberu si nampati pelayanen Jesus, si mediate nandangi pelayanen silakoken Jesus. Tentu guna keutuhen jabunta perlu kal kita tetap erlajar kerna biak perbulangen ras anak-anakta i tengah-tengah jabunta.

Pengajaren erkawiten ras metode pengajaren sinipeseh kita nandangi jabunta. Tep-tep wari kita jadi pengajar ras pelajar i bas sekolah kegeluhenta. Menaken i bas bertin seh ku bas kita nadingken doni enda, tetap erlajar segedang geluhta. Meriah kal i bas jabu adi pasangen si tandan la terjeng si tandan rupa. Secara psikologis banci si idah perbedan antara dilaki ras diberu, umumna dilaki lebih menonjolkan hobbyna, mencintai pendahinna, mobilna ras barang kesukanna. Adi nonton TV lebih merhat ia ngganti-ngganti chanel TV, adi diberu nonton TV serius ras la merhat ngganti siaran TV, emaka diberu ngasup nonton sinetron alu la ngganti-ngganti chanelna. Dilaki pedas latih otakna erkiteken ia mbue make rasio, pikiren, emaka i rumah ia perlu ketenangen labo megiken jungut-jungut. Adi diberu lit masalahna ngeranai atena lalap, banci saja curhat ia man perbulangen gelah salang pusuhna, tapi adi dilaki lit masalahna pangen akapna sisada ngukurisa asangken nuriken isi pusuhna man kalak sideban. Tentu melala denga nge perbedan antara dilaki ras diberu. Emaka selaku ndehara perlu kal lebih nandai biak perbulangenta, gelah malem kal ateta sabap banci si bangun jabu si lebih harmonis. Gelah la lalap si tuntut kalak si berubah, padahal perubahen si lit i bas dirinta banci sie ngubahken kalak sideban, terlebih perubahen i bas pasangenta.



2. Enggo me malem ateta ngidah biak si lit i bas perbulangenta ?

3. Tuliskenlah 5 saja biak si mehuli i bas perbulangenndu i bas kertas warna merah jambu ( pink), ( kertas isikapken Moria Runggun / sektor) jenari bereken man perbulangenndu i bas ulang tahun Mamre se-GBKP enda. Ngidah biak si mehuli ( positif ) e jadi kekuaten man banta ras pasangenta.
Benakenlah i bas jabunta guna ngenen biak si mehuli. Ula lalap si nen biak si la mehuli bicara lit gia si idah biak si bage i bas pasangenta. Benakenlah genduari nari!

Pdt. Natalidna Tarigan, M.TH


0 Response to "Hari Ulang Tahun Mamre GBKP - Ku Tandai Perbulangenku ( Bahan PA Moria 18 - 24 Agustus 2019 )"

Post a Comment

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel