Bahanlah Megah Iakap Orangtuandu - HUT SAITUN GBKP ( Bahan PA Mamre 11 - 17 Agustus 2019 )


Bahan Bimbingen PA Mamre 11 - 17 Agustus 2019
HUT SAITUN GBKP

Ogen : Kuan-Kuanen 23:25
25. Bahanlah maka megah iakap nande bapandu; malemlah ate diberu si mupusken kam.
Tema : Bahanlah Megah Iakap Orangtuandu

Tujun : Gelah Mamre
  1. Nggejapken mulihi maka orangtua e me tan Dibata guna engkelengi, njagai ras negu perdalinen geluhta
  2. Meteh maka enghamati orangtua e me wujud engkelengi ras mehamat man Dibata 
Metode : Sharing ras aksi

KATA PENARUH
Lit sada ungkapen ngatakenca, "kalau orangtua yang kaya raya, maka anak jadi raja; tapi kalau anak yang kaya raya, maka orangtua jadi merana". Litna ungkapen enda tentu erat hubungenna rikutken situasi kegeluhen jaman gundari. Banci jadi lit kasus maka anak sienggo lit jabuna ras mandiri, enggo kurang nginget, ras ngergaken orangtua si enggo metua alu alasen kesibuken pendahin tanggungjabab man anak jabuna ras sidebanna. Tentuna kita labo setuju ungkapen enda, sebab i bas sisi orat geluhta kalak karo, nai nari kin kita iajar mehamat man kerina sangkep geluhta, terlebih man orangtua.

Uga kin kita enghamati orangtua? Mehamat man orangtua tentuna alu ncidahken sikap i bas ngerana ras perbahanen. I bas pusuh, kita selaku anak arus tetap menghargai posisi orangtua sebagai kalak sipatut ihargai ras ihamati. I bas Pustaka Si Badia, Dibata tuhu ngergaken posisi sebagai orangtua sipatut ihamati. Kehamaten man orangtua, seh maka Dibata mereken pedah si isuratken sebagai hukum i bas 10 pedah Dibata ( Kel. 20:12 ). Mehamat man orangtua e me sada perintah i bas Pustaka Si Badia siulihna Dibata mereken umur singgedang. Kalak si enghamati orangtua geluhna ndatken pasu-pasu ( Jer. 35:18-19 ).

Hari ulang tahun ( HUT ) Saitun GBKP si pe-28 tahunken jadi sada kesempaten simehuli man gereja sebagai organisasi pelayanen lako nehken kehamaten ras ngergaken orangtua segelah megah ras malem atena nggeluh. Kai dage sibanci silakoken?

URAIAN TEKS / TAFSIRAN
Pengajaren Raja Salomo kerna uga arusna anak man orangtua. Pedah si ibereken man anak-anak guna kiniulin geluh, arus ia metinggel, mehamat ras megermet. Ranan simehuli ibelasken orangtua man anak-anakna gelah orangtua banci ngajarken / mendidik anak itengah jabu rikutken orat sipayo man anak-anakna. Si enda ibenaken i bas; ndengkehken alu payo, megermet i bas perdalanen nggeluh, em sijadi kepentaren i bas geluh (ay. 19). Kepentaren turah arah ndengkehken alu tutus; sekalinari; 'Begikenlah ranan bapandu;...(ay. 22), sebab menurut Raja Salomo labo lit sura-sura orangtua si la mehuli man anak-anakna. Mehamat man bapa secara kedagingan sienggo 'memperanakkan' kita, bapanta si jadi sarana / alat Dibata maka kita enggo tubuh ku doni enda, tentuna ka pe lebih mehamat man Dibata secara pertendin sienggo njadiken kita. Bage pe erkiteken nandenta sierkemalangen man Dibata, mereken pengajaren simehuli, emaka ola kal lit anak simpersilahang pengajaren nandena si enggo metua sebab melala tahun-tahun si enggo ibentasina raduken pengajaren ras kepentaren si enggo iberekenna man anak-anak, bage me nina Raja Salomo mereken pedah. Si perlukal iperdiateken; Si Pemena: kewajiben anak guna erbahan senang ukur orangtua ( ersada arih ras sikelengen itengah jabu ), secara terus menerus gelah orangtua ersurak-surak i bas pusuhna erkiteken lagu langkah anak-anakna. Aminna pe wari-wari kinituan enggo ndeher janah lanai lit kesenangen erkiteken urak gegeh ras kesehaten, tapi tetap banci ersurak i bas pusuh natap kegeluhen anak-anakna simehuli. Si Peduaken: anak-anak jadi keriahen man orangtua erkiteken nggeluh i bas kebenaren ras kepentaren.  Kebenaren e me kepentaren situhu-tuhu. Kebenaren i bas ngelakoken simehuli njadiken dirinta lebe mehuli. Benar berarti isi pusuhna tulus ras sura-surana mehuli kerina. Jenari pentar / bijak, berarti penuh penilaian ras pertimbangen ( megermet ), i bas ngaturken kegeluhenna.

Man anak sibage pergeluhna mereken kemegahen ras kemalemen ate man orangtua. Ngataken bujur orangtua man Dibata. Lanai i inget kiniseran sindube i bas pebelinsa, khususna nande simupus kenca, lanai igejap kiniseran sienggo pernah ibentasi, tapi kerina enggo salih jadi kemegahen ras kemalemen ate. Kiniseran terlupaken bagi iembusken angin, erkiteken anak ndai enggo jadi anak singgeluh i bas kebenaren ras kepentaren Dibata.

APLIKASI 
Orangtua e me nande bapa ( sukut; sembuyak, senina ), rikut nge si biak mama mami ( kalimbubu ), si biak bibi bengkila (anak beru), nini bulang ras nini tudung i bas rakut sitelu. Menaken kin kita tubuh ku doni enda lit ngenda ndube ( i bas si adi ), toto ras kata ajar guna jadi pasu-pasu i bas orangtua ras sangkep nggeluh nari. Umpamana tupung kita tubuh; reh kalimbubu  nina, "enda anakku, ibaba kami mamandu / mamindu uis arinteneng man ndawandu, gelah pepagi kam bere-bere kami mereken ketenengen ukur. Mejingkat suruh mamina, la nogan adi ajarken mamana". Jenari reh me sibiak sembuyak nina, "enda anakku, ibaba kami bapandu / nandendu uis gatip 20-2 (entah pe uis si erjongkiten), ertina; tektek la mbera retap; taka la mbera beka; bage me pagi biakndu rukur anak kekelengen kami ku orangtua, sekali uga gia pergeluh sini baba, ula kel pagi merso ernande erbapa gelah ula kal pepagi kebilangen ibahan Dibata". Biak senina, sipemeren si paribanen sipengalon sendalanen ( biak bapa-nande ) maba uis beka buluh maka nina, "enda anakku ibaba kami uis beka buluh  (anak dilaki ) si ertina anak kami gelah kekelengen e pepagi pinter, ( garis2 lurus ) rukur pinter; ( Megara ), ertina perpang / la percik-cik; (mbentar) ertina bujur i bas rukur ras perbahanen." Emaka si perpudina reh e me Anak Beru  maba uis langge-langge / ragi barat janah nina, "enda anakku uis langge-langge / ragi barat si ertina Ragi; kegeluhenndu pepagi njadiken si la ernanam jadi ernanam; Barat Bicara juma ndai kin idahiken dahin e alu tutus. Gelah kam pe pagi i bas ndahiken dahinndu alu tutus la banci lang ialokenndu pagi upahna".

Kemegahen ras kemalemen ate orangtua labo i bas litna pemere anak man orangtua, tapi pemena i bas kegeluhen siersada ras sikeleng-kelengen itengah jabu, peduaken kegeluhen anak siratur i bas pendahin, muat bagin i bas peradaten ( bermasyarakat ) ras si peteluken nggit mereken penampat i bas kepiceten / kiniseran kegeluhen kalak sideban. Sifat dasar kalak karo, ulin me kita mere asangken kita mindo. Enda me sijadi kemegahen ras kemalemen ate orangtua. Tapi selaku anak pe, tentuna kita tetap mperdiateken orangtua; perhatian ( waktu ), kebutuhen / keperlun i bas jabu, kesehatenna ras aktivitasna siteptep wari. Kerina enda nampati orangtua guna tetap ermeriah ukur ras semangat i bas ndalani kegeluhen. Selaku Mamre si erdiate ras erpemere, adi si lakoken kiniulin man orangtuanta ( Saitun ), tentuna jadi curmin man anak-anakta guna mewarisi simehuli e.

I bas HUT Saitun GBKP, perayaan seremonial merupaken hal sicukup penting ( i bas Runggun/ Klasis ). Sebab lit ije perjumpaan saitun i bas kebaktin, megiken kata Dibata, lit ka deba seh kubas kegiaten ceramah budaya, kesehaten ras senam kesehaten gaya Saitun. Tapi si paling utama akap kami, ( kita si la tading ras orangtua ), erbahan waktu si khusus secara teratur ndahi orangtuanta Saitun, ikut ras kempu-kempuna si tuhu-tuhu jadi keriahenna i bas jumpa ras si nur surna. Selamat HUT Saitun ninta Mamre GBKP. Seh asa umur singgedang ipasu-pasu Tuhan.

SHAR1NG & AKSI
  1. Nuriken pengalamen / suka duka ras Moria / anak-anakta itengah jabu guna engkelengi orangtua / Saitun ( sitading ras kita bage pe si la tading ras kita). 
  2. Aksi. Komitmen mendukung program pelayanan Saitun GBKP i bas kerina tingkaten ras mperdiateken kegeluhen orangtuanta alu mehuli.
USULEN ENDE-ENDEN
  1. KEE GBKP No. 317:1-2 ( KLIK JUDUL KEE UNTUK MELIHAT LIRIK TEKS )
  2. KEE GBKP No. 226:1-4 ( KLIK JUDUL KEE UNTUK MELIHAT LIRIK TEKS )
  3. KEE GBKP No. 292:1,3 ( KLIK JUDUL KEE UNTUK MELIHAT LIRIK TEKS )
  4. KEE GBKP No. 303:1,3 ( KLIK JUDUL KEE UNTUK MELIHAT LIRIK TEKS )
  5. KEE GBKP No. 451:1-3 ( KLIK JUDUL KEE UNTUK MELIHAT LIRIK TEKS )

Pdt Amos R. Ginting, S.Th 
Ketua Klasis Berastagi 
HP. 082161494067






0 Response to "Bahanlah Megah Iakap Orangtuandu - HUT SAITUN GBKP ( Bahan PA Mamre 11 - 17 Agustus 2019 )"

Post a Comment

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel