Mamre Erdiate, Mamre Erpemere! Beasiswa Mamre - Melumbar I Bas Nampati ( Bahan PA Mamre )


Bahan Bimbingen PA Mamre 16 - 22 Juni 2019
(MAMRE ERDIATE, MAMRE ERPEMERE! BEASISWA MAMRE ) 

Ogen :Kuan-kuanen 11:24 - 25
24. Lit kalak si melumbar mere, tapi tambah-tambah kebayakenna,
lit kalak degil, tapi tambah-tambah kemusilenna.
25. Melumbarlah mere maka kam reh bayakna,
sampatilah kalak maka kam pe isampati.
Tema :Melumbar I Bas Nampati

Gelah Mamre:
  1. Sadar biakna selaku kalak melumbar.
  2. Ertanggungjabab lako nampati.
Metode : Diskusi

KATA PENARUH.
Sisampat-sampaten e me tanggungjabab kalak si erkiniteken i bas geluhna. Sabap Dibata nepa manusia, labo gelah nggeluh sisada-sisada ntahpe terjeng ras kelompokna saja ngenca. Manusia itepa labo guna rukur kerna dirina saja ngenca. Tapi gelah banci nggeluh ersada ( koinonia ) dingen sisampat-sampaten ( diakonia ) ras tinepa si deban. Enda me arusna jadi palas rukur man manusia i bas ndalanken kegeluhenna. Erdandanken si e perlu ras penting kal man manusia lako rukur kerna kalak si deban. Secara khusus Mamre, si enggo mpetangkas jati dirina arah motto Mamre Erdiate, Mamre Erpemere. Motto enda mpetangkas maka perbapan i GBKP biakna eme biak kalak si mesegu i bas nampati kalak si deban. La atena ketadingen i bas nehken penampatna man kalak si man sampaten. Biak si bagenda me si perlu ipeturah ras isaksiken Mamre i bas geluhna.

URAIAN TEKS TAFSIRAN
Kitab kuan-kuanen e me kitab si isina kata-kata pengajaren si isehken Salomo. Kitab enda nuriken kerna pentingna manusia nggeluh i bas kepentaren ras pemeteh. Kepentaren ras pemeteh e labo si erpalasken doni, tapi kepentaren ras pemeteh e banci ialoken sekalak jelma adi kin ia nggeluh erkemalangen man Dibata ( Bdk. Kuan 1:7 ). E ngatakensa kerina pemeteh ras kepentaren e rehna labo i doni enda nari, tapi rehna i bas Dibata nari. Emaka la banci lang nggeluh erkiniteken man Dibata jadi kata Kunci man manusia si ersura-sura ndatken pemeteh ras kepentaren i bas geluhna. Sabap kerina pemeteh ras kepentaren si rehna i bas Dibata nari pasti erguna man kalak si deban. Tapi si rehna bas doni enda nari erguna terjeng doni ras dirina saja ngenca. Pengajaren-pengajaren si bage me si arus ipeseh man kalak si nguda denga.

Salah sada pengajaren si arus iajarken eme kerna erdiate ras nampati kalak si deban. Kalak si rusur nampati pasti kegeluhenna pe reh ulina. Si enda me si ipetangkas i bas Kuan-kuanen 11:23, nina: "sura-sura kalak bujur erbuahken kiniulin, tapi adi seh sura-sura kalak jahat nembeh ate kalak kerina". Ertina maka pusuh si ersura-sura i bas nampati kalak si deban labo mabai manusia kekurangen bas geluhna, tapi ialokenna me pagi si terulin. Janah sie kerina enggo ipadanken Dibata man kalak si tek man baNa. Kiniteken si bagenda me si ipetangkas bas ogenta gelah teptep manusia arus min mperdiateken kalak si lit isekelewetna.

Alu tangkas arah bahan ogen ituriken maka kalak si erkiniteken arus njadiken maka melumbar mere man kalak si deban arus jadi sada biak bas geluhna. Melumbar man kalak si deban labo njadiken manusia reh musilna. Kai si iangkatken kitab Kuan-kuanen 11:24-25 petembil ras caranta rukur. Semalna kalak si melala iamburkenna erta-ertana pasti urak i bas ia, janah kalak si bunikenna kinibayakenna pasti la urak ertana. Secara kegeluhen doni payo bage.

Tapi sebalikna, kalak si pengarapenna erpalasken keleng ate Dibata, la ia mbiar i bas nampati kalak si deban. Aminna pe ituriken maka kalak si melumbar e pasti itambahken Dibata kinibayakenna, labo e saja ngenca palasna man bana. Sabab lit palas si deban si mabai ia melumbar mere ras nampati, e me tanda atena keleng man kalak si deban. Emaka labo lit kebiaren ras kearun ate i bas ia aminna gia ia arus nampati kalak si deban. Sabab i bas kiniteken ras pengarapenna tek ia maka Dibata pasti nikapken si mehuli man bana. Bagi si ipetangkas i bas Perbahanen Rasul-Rasul 20:35, nina: "Malemen kap ate i bas mere asangken i bas ngalo".

APLIKASI.
Lit dua si banci siperdiateken i bas melumbar nampati. Si pemena e me beasiswa Mamre. Mamre enggo nuduhken maka perlu kal nampati anak-anakta i bas persekolahenna. Salah sada cara alu mereken dana beasiswa. Janah dahin enda enggo ijadiken sada tradisi i bas kategorial Mamre. I bas tahun enda pe iajuk kerina Mamre gelah ikut ertanggungjabab i bas nampati persekolahen ( perkuliahen ) anak-anakta si membutuhken. Mamre enggo nuduhken maka ia banci jadi pasu-pasu man kalak si deban. Gelah reh terakapna penampat e man anak-anakta, tentu ibutuhken pe kiniersadanta Mamre ikut nehken penampatta guna mendukung dana beasiswa e. Mamre labo perlu mbiar, sebab enggo piga-piga tahun ilakoken pelayanen e, Mamre labo pernah kekurangen. Justru sebalikna, teptep tahun reh tambahna beligan anak-anakta isampati Mamre. Enda perlu terus ipertahanken ras itingkatken Mamre.

Si peduaken e me nampati ras mperdiateken kegeluhen anak-anakta si enggo melumang i Panti Asuhen Kristen Gelora Kasih. Keleng ateta nandangi anak-anakta e. Selaku anak metedeh kal ia keleng ate orangtua. Janah si gejap min maka kita selaku bapa ( kategorial Mamre ), ertanggungjabab jadi orangtua man anak-anakta enda. Kecibal anak-anakta e pe labo banci silupaken sabab anak-anakta e anak itengah-tengah gerejanta. Selaku bapa itengah gereja ikut kita ertanggungjabab nampati anak-anakta e. Kita ipake Dibata lako mperdiateken anak-anakta enda.

Mperdiateken anak-anakta enda banci ilakoken erbage-bage cara, umpamana: nehken penampatta secara pribadi ku PAK Gelora kasih; tupung kita nehken persembahen pengataken bujur si inget ka min anak-anakta i PAK Gelora Kasih; janah banci ka pe alu cara-cara si deban si banci si lakoken. Janah banci ka pe i bas kita mperingeti hari jadi PAK Gelora Kasih tanggal 16 Juni 2019 enda ( bage pe Hari Anak Yatim sedunia tanggal 26 Juni 2019 ), perpulungen Mamre banci ka erbahan aksi alu ndahi ras nampati anak-anakta si lit i PAK Gelora Kasih. Alu arapen reh teremna kita mperdiateken anak-anakta enda, reh tergejapna penampat e man kerina anak-anakta si enggo melumang. Teklah kita, maka kalak si melumbar mere ikuhi Dibata me kap kegeluhenna.

DISKUSI
  1. Diskusiken kai nge palasna maka kalak si erkiniteken arus dingen ngasup melumbar mere ras nampati kalak si deban?
  2. Kai-kai saja aksi si banci ilakoken Mamre guna ngelitken dana beasiswa Mamre bagepe nampati anak-anakta i bas PAK Gelora Kasih? Turikenlah aksi si ngasup kita ngelakokensa, banci secara sektor ntahpe pribadi.

USULEN ENDE-ENDEN
  1. KEE GBKP No. 289:1-3
  2. KEE GBKP No. 366:1-3 
  3. KEE GBKP No. 375:1-4
  4. KEE GBKP No. 175:1-3 

CATATAN : Minggu, Tanggal, 23 - 29 Juni 2019 eme PA Minggu keluarga. lbas minggu e ilakoken PA bersama Mamre, Moria, Saitun ras Permata. Ngarap kami gelah silakoken PA gabungen Mamre. Moria, Saitun ras Permata.

Pdt. Dicky A. Bangun, M. Th 
HP. 081263231231

0 Response to "Mamre Erdiate, Mamre Erpemere! Beasiswa Mamre - Melumbar I Bas Nampati ( Bahan PA Mamre )"

Post a Comment

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel