Cara Rukur Mehuli Maba Kesehaten - Rukur Mehuli Eme Tambar ( Bahan PA Mamre 30 Juni - 6 Juli 2019 )


Bahan Bimbingen PA Mamre 30 Juni - 6 Juli 2019
Cara Rukur Mehuli Maba Kesehaten

Ogen : Kuan-kuanen 17:22
22. Keriahen desken tambar si mereken kejuah-juahen,
adi ukur serbut erbahanca daging kertang tading tulan.
Tema : Rukur Mehuli Eme Tarnbar

Tujun : Gelah Marnre
  1. Meteh maka ngena ate Tuhan kalak si geluhna dem alu keriahen
  2. Nggejabken nggeluh i bas keriahen e eme erpalasken janji / undanger Dibata, erkiteken Dibata ingan pengadi-ngadin
Metode : Sharing/ceramah

KATA.PENARUH
Beluh lah kam rukur. Megati belas-belas enda isehken man banta ntah pe si sehken man kalak si deban. Payo, mbelin kepe ulih man kula ras tendi kebeluhen rukur enda. Sabab lit si erbelas nina pinakit buen reh arah cara rukur si la mehuli ( la sehat ), ukur mpengaruhi daging kula.

Umumna erbage masalah si reh ku bas geluh ngganggu kesehaten manusia. Banci mesera tunduh, stress, depresi ras sidebanna erkiteken erbage ukur si la mehuli ( la positif ) si iasuhina. Alu kata sideban rnaka kalak si rukur alu mehuli ( positif ) ngasup nampati kalak si sakit kin pe banci reh lampasna malem sabab ia jine si ngkuasai ( mengendaliken ) ukurna kempak si terulin. Janah rukur alu mehuli jadi kunci utama mpedauh "stress" ras njaga kesehaten alu mehuli. Kuga kin rukur alu mehuli, arah PA Mamre minggu enda erlajar tole arah kitab Kuan-kuanen.

URAIAN TEKS / TAFSIREN
Kitab Kuan-kuanen umumna nuriken kerna erbage pedah kalak pentar sitertulis jadi pengajaren man kalak sideban gelah geluh reh ulina subuk arah perbahanen bagepe nuriken kebenaren, keadilen ras kebujuren, naksiken ras nuriken kerna kegeluhen. Erbage perbahanen mereken ulih, sienda banci ierti alu ketengeten.

Arah teks Kuan-kuanen 17:22 enda lit dua si ate penulis isehkenna dingen sienda ngajuk kalak si ngogesa nentuken pilihen, apai atena si ilakokenna.
1. Keriahen desken tambar si mereken kejuah-juahen 
• Keriahen ( Ind. Hati yang gembira ) eme kecibal ukur si kuh alu keriahen. Ngerana kerna keriahen enda labo turah erkiteken kalak sideban. Megati lit kalak singatakenca, meriah kal ukurna erkiteken pulung kerina anak-anakna, kuga adi la pulung anakna? Lanai nge teriahkenna ukurna, lanai nge ternanamina kegeluhen alu mehuli?
• Tambar ( Ind. Obat yang rnanjur ), eme sada hal si ngasup mengubahken kecibal daging kula, sakit jadi malem, mbiar jadi tetap ukur. Tambar enda ramuan, subuk tradisional ulih nini-nininta nai ntah pe raciken ahli medis alu ukuren si enggo itentuken man daging kula.
• Kejuah-juahen, enda ulih, situasi daging, kula tendi, sejahtera, ermalem ate ( bdk. Kuan 14:30 )

Bageme kepeken keriahen ukur banci jadi tambar man pusuh, ngkuhi kerina tambar si reh idarat kula nari alu bentuk pil, inemen ntah ramuan kai pe.

2. Ukur serbut erbahanca daging kertang tading tulan
• Ukur serbut ( semangat yang patah ), adi enggo serbut mesera kal mpelikasisa, adi enggo serbut enggo me rulut-ulut lanai terpinterken. Kuga nina banci rukur alu teneng, semangat adi enggo serbut Semangatna enggo penggel, lanai lit kegeluhen si mehuli.
• Daging kertang tading tulan ( mengeringkan tulang ), ulih ukur sebut ndai kepeken nguraki daging kula, lanai sehat

Bagenda me ulih rukur alu mehuli ntah pe rukur la uli; ulih ukur serbut pe enggo me elas ituriken. Penulis Kuan-kuanen ngajuk si ngoge, ngerenungken duana situasi enda kenca e nentuken pilihen nandangi geluhna. Apai nge gatin si lakoken?

APLIKASI
La sitik pinakit siturah i bas kegeluhen enda, apai ka i bas jaman sigenduari, ertambah buena jenis pinakit, la si arap lit lalap tambah gelar pinakit si mbaru. Tentuna enda sendalanen ka arah teknologi pengobaten si idatken ntah pe erbage pengobaten alternatif si lit. Tentuna enda cara ras tambar idarat daging kulanta. Salah sada tambar situhu-tuhuna eme keriahen ukur. Tambar kai pe isehken, iinem, adi lanai lit keriahen ukur labo mpepalem daging kula si pinakiten. Arah Kuan-kuanen enda, iajuk Mamre gelah reh beluhna rukur alu mehuli. Megati ikataken cara rukur Mamre eme make logika la seri ras Moria. Adi Moria alu perasan, emosional. Tapi duana radu ngkuhi.

Lit lagu Anak Sekolah Minggu erpalasken teks bahan PA enda 'Hati yang gembira adalah obat, seperti obat hati yang senang, tapi semangat yang patah keringkan tulang, hati yang gembira Tuhan senang'. Dibata meriah ukurna natap anak-anakna ermeriah ukur. Tentuna maka banci kita ermeriah ukur pasti erkiteken erkiniteken dingen ngandalken Tuhan i bas kegeluhenta. Uga pa pe buena si la bagi ukur, labo kita ngasup ngaturkenca, alu ukur si teneng, ukur si sabar, meriah dingen semangat maka banci kita jumpa dalan pulah. Adi ukur si serbut, jumpa perbeben, reh serbutna ras gulutna nari nge ngenca, me labo jumpa dalan pulah.

Arah bahan PA enda, mari sibaba man Tuhan erbage si la bagi ukur, si erbahan gulut i bas ia inganta ngadi. Tetaplah rukur alu mehuli, cara pikir positif, ulihna positif si negatif ulihna si la uli. Tetaplah rukur alu mehuli maka mejuah juah kula ras tendita, Sabab cara rukur si mehuli erbanca ndauh pinakit i bas kita nari.

Tugas Mamre eme njaga ukur si mehuli tetap mehuli, la terpengaruh situasi si la uji. La saja njaga cara rukurna tapi mpengaruhi cara rukur anak jabu, Moria ras anak-anak. Mereken pengaruh si mehuli alu bage isi jabu banci mejuah-juah dingen mereken 'energi positif' man kalak sideban. Keriahen ukurta la saja jadi tambar man banta ras isi jabu tapi pe kehadirenta jadi tambar ras kemalemen ate nandangi kalak sideban.

SHARING / CERAMAH
Adi enggo isikapken narasumber guna PA enda ilakoken ceramah alu tema "Rukur mehuli eme tambar'. Tapi adi langa isikapken ilakoken sharing.
  1. Kuga penggejapen ntah pe pengalamendu rikutken oraten PA enda? Turikenlah!
  2. Kai tekad Mamre rikutken pengalamen si enggo pernah idalani gelah Mamre reh sehatna kerina? Turikenlah!
ENDEN-ENDEN :
  1. KEE GBKP No.293 : 1, 2  
  2. KEE GBKP No. 202 : 1,4  
  3. KEE GBKP No. 315 : 1- 4
  4. KEE GBKP No, 276 : 1-2  



Pdt. Suenita Sinulingga, M.Th
Ketua Moria Pusat
Hp. 081397380916

0 Response to "Cara Rukur Mehuli Maba Kesehaten - Rukur Mehuli Eme Tambar ( Bahan PA Mamre 30 Juni - 6 Juli 2019 )"

Post a Comment

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel