Bapa Si Mediate - Bahan Bimbingen PA Mamre 14 - 20 April 2019


Bahan Bimbingen PA Mamre 14- 20 April 2019
HUT KAKR

Ogen : Jop 1:1-5
Jop iuji Iblis
1. I negeri Us lit sekalak dilaki, Jop gelarna. Ia nembah janah erkemalangen man Dibata. Ia kalak si mehuli, janah la lit perbahanenna si jahat.
2. Anakna pitu dilaki, telu diberu;
3. biri-birina lit pitu ribu, untana telu ribu, lembuna seribu ras keledena lima ratus. Suruh-suruhenna pe seh kal teremna. E maka banci ikataken ia me si bayakna i Timur.
4. Anak-anak Jop si dilaki semal erbahan pesta man-man alu ergiliren, janah anak-anakna si deban pe ikut reh ku pesta e. Turangna si telu pe tetap itenahkenna ikut pulung.
5. Kenca tiap pesta enggo dung, lampas erpagi-pagi keke Jop, jenari ipersembahkenna persembahen tutungen guna pebadiaken anakna e sekalak-sekalak. Si e ilakokenna sabap rukur ia, banci jadi anakna e enggo erbahan dosa si la teridah, janah erkiteken si e ceda ukur Dibata alu la iarapna.
Tema : Bapa Si Mediate

Tujun : Gelah Mamre
  • Sedar kerna tanggungjababna sebagai bapa itengah jabu
  • Ertanggungjabab nandangi kegeluhen anak 
Metode : Diskusi

KATA PENARUH
Adi sinehen piga-piga tahun enda maka melala kel terjadi kecelakaan lalu lintas si ialami anak dibawah umur. Mbue gundari pengguna kendaraan bermotor e si lenga kin pantas umurna guna berkendara, tapi engkai maka e banci jadi? Bage pe si jadi pengguna obat-obat terlarang ntah pe si menonton video porno melala kel situhuna e me anak-anak si lenga seharusna ndatken ijin guna mengakses si e kerina. Janah para pemerhati anak ngataken maka e kesalahen orangtua si mpediat, si terlalu membebasken anak-anakna, ntah pe si la mediate man anak-anakna.

Lit ka pe istilah si umum i bas kita eme adi anak e hebat, pintar, juara, berbakat, maka simegati ibelasken eme "siapa dulu bapaknya." Terangkat ka ije gelar sekalak bapa erkiteken prestasi anakna. Tapi megati maka proses guna anak e banci erprestasi, hebat ras si debanna kerina adi sungkun anak e, ise nge si ngajarisa maka jarang kel kata bapa ibelasken. Janah i bas situasi si bagenda maka si rusur jadi alasenta Mamre eme kita sibuk erdahin, ncari guna keperlun anak-anak e kerina. Wari enda erlajar kita seh ija kin situhuna tanggungjababta selaku bapa janah kuga kin arusna kita ndalankenca itengah jabunta.

URAIAN TEKS / TAFSIREN
I bas pengogenta ikatakenna maka Job kalak si istimewa, hal enda teridah arah penjelasen penulis e me:
  1. Kalak si bayakna i Timur i bas masa sie. Mbue asuh-asuhenna dingen pe suruh-suruhenna seh kal teremna. Ambah sie Job pe ikataken sangap erkiteken enterem anakna ( pitu dilaki, 3 diberu ). Tuhu adi rikutken ukuren sigenduari, Job enggo me masuk kategori istimewa, tapi situhuna labo erkiteken sie saja maka ia ikatakan istimewa. Lebih asa sie eme Job erngena ate man Dibata. 
  2. Erkemalangen man Dibata. Job bayak tapi tetap denga erngena ate man Tuhan. Adi siterusken ngoge kitab job enda banci si idah kuga pengakun Job bahwa kerina Dibata mpunasa, emaka bicara ibuatNa ka pe kerina e hak Dibata ngelakokenca. Jadi pantas kel pernyataan penulis enda bahwa Job eme kalak si tutus, erkemalangen man Dibata, mehuli dingen la ngelakoken si jahat. 
  3. Job e me kalak si ertanggungjabab nandangi keluargana. Hal enda teridah arah anak-anakna si memiliki rumah masing-masing ( bdk. Alkitab, Ayub 1:4 ), iukurkenna kesejahteraan anak-anakna. Lebih asa sie Job berfungsi jadi rohaniawan i tengah jabuna. Menurut para ahli maka job enda nggeluh i bas zaman si lenga lit nabi, imam ntah pe peminpinna. Ia nggeluh ndauh ope masa Abraham. Job ncukupken keperlun jasmani, rohaniawan si nuriken kerna Dibata, notoken anak-anak ras kerina isi jabuna dingen pe bertindak tegas i bas ndalanken sura-sura Dibata.
  4. Tupung anakna secara pegancih erbahan pesta, banci tole nari siidah keberhasilen Job mendidik anak-ariakna e me: teridah kiniersadan arih i bas anak-anakna, pegancih erbahan pesta janah senina turangna si deban pe reh ku pesta e. Sie ncidahken maka Job ngasup ngajarken maka si 10 anakna e si keleng-kelengen.
  5. Janah tep-tep pesta e enggo dung, Job ndilo anak-anakna ( Bdk. Alkitab, Ayub 1:5 ). Banci jadi pesta e berlangsung piga-piga wari tapi kenca dung pesta e ilebuhna anakna ndai kerina guna ipebadiaken. Job ndilo ia janah kerina ia reh. Job mpersembahken tutungen sejumlah kerina anak-anakna. Teridah kel ije maka Job concern ( peduli ) nandangi kegeluhen kiniteken anak-anakna. Job ngangkai maka i bas meriah ukur, i bas pesta banci jadi mesukah kel kalak ndabuh ku bas dosa. Kata pebadiaken anak-anak enda banci iertiken maka Job erbahan waktu khusus guna ercakap-cakap ras anak-anakna e, cerita-cerita kerna keriahen pesta e jenari iberekenna pe pedah ajar man anakna, mengoreksi adi lit si la payo sedekah pesta e. Job sekalak bapa si realistis, iangkaina tuhu bahwa anak-anakna pe manusia biasa si mesukah ndabuh kubas dosa, si banci saja gagal i bas ngikutken kata Dibata. Emaka selaku bapa Job tetap ndalanken fungsina selaku bapa anem gia anak-anakna enggo dewasa.
Adi sinehen perbahanen Job selaku bapa, tuhu teridah ia sekalak bapa si mediate ( tema PA nta wari enda ). Mediate i bas kebutuhan jasmani anak-anakna, ncukupken keperlunna seh dewasa. Mediate nandangi sifat duniawi anak-anakna alu tetap mengijinken anak-anakna erbahan pesta secara bergiliren. Mediate nandangi kebutuhen anak kerna keteladanen alu tetap menjalin komunikasi si mehuli ras anak-anakna. Bagepe mediate nandangi pertumbuhen rohani anak-anakna alu mpebadiaken ia kerina dingen ertoto mpersembahken tutungen man Dibata segelah anak-anakna tetap nggeluh bagi si ngena ate Dibata.

Bapa si mediate la terjeng kerna keperlun materi tapi pe secara keseluruhen, banci jadi bahan perenungen man banta Mamre i bas wari enda. Bahwa kepeken tanggungjababta seh kel belinna nandangi anak-anakta. Kita jadi usihen si pertama man anak-anakta, kita pe ertanggungjabab kerna pergaulenna ras pertumbuhen sosialna. Kuga kita ngajarken kerna keleng ate rnan anak-anakta, ngajarken kekompaken ersenina erturang. Dibata menernpatken kita Mamre selaku bapa gelah banci jadi wakil Dibata (rohaniwan) itengah jabu. Kita arus mpelajari kata Dibata alu mehuli, ngerembakken diri ras Dibata, janah sie iidah dingen iusih anak-anakta. I bas peringeten kerna HUT KAKR enda iajuk kita guna merenungken kesempatan si enggo ibereken Dibata man banta gelah min sipergunaken alu mehuli. Labo lit kalak erbahan kudin taneh kenca tanehna e enggo kerah ntah pe piher, tapi tupung taneh e medate denga ije me ibentuk jadi kudin si isuraken kita. Bageme pe tupung anakta e nguda denga e me kesempaten man banta guna rnembentuk karakter si mehuli i bas dirina.

DISKUSI 
  1. Bereken pendapatta kema Job i bas ia ndalanken tanggungjababna selaku bapa!
  2. Adi siperdiateken kuga job tuhu-tuhu mediate man anak-anakna, i bas d siapai nge kita kurang mediate nandangi anak-anakta? ampar
USULAN ENDE-ENDEN
  1. KEE GBKP No. 278 :1-3   ( KLIK JUDUL LAGU UNTUK MELIHAT LIRIK )
  2. KEE GBKP No. 279 :1-4   ( KLIK JUDUL LAGU UNTUK MELIHAT LIRIK )
  3. KEE GBKP No. 469 (2X)  ( KLIK JUDUL LAGU UNTUK MELIHAT LIRIK )
  4. KEE GBKP No. 417 : 1-2  ( KLIK JUDUL LAGU UNTUK MELIHAT LIRIK )


Pdt Oklin Jovalina Tarigan,S.Si. Teol 
(Pendeta Tugas Khusus KAKR) 
HP 081370461616


0 Response to "Bapa Si Mediate - Bahan Bimbingen PA Mamre 14 - 20 April 2019"

Post a Comment

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel