Anak Si Pentar Keriahen Orang Tua - Bahan Bimbingen PJJ 7 - 13 April 2019


Anak Si Pentar Keriahen Orangtua 
( HUT KAKR )

Si Man Ogen : Kuan-Kuanen 23:13-16
13. Ola kam biar-biaren ndidik anakndu, adi ipekpekndu ia labo ia mate,
14. tapi selamat.
15. O anakku, meriah kal ukurku adi pentar kam.
16. Ersurak pusuhku megiken kam melasken ranan si dem pemeteh.
"Belajar dari penunggang kuda pada saat perlombaan balap kuda, Sipenunggang ( joki ) akan memukul kudanya itu agar lebih cepat berlari dan dapat menjadi juora. Tapi, jika si joki memukul kudanya sembarangan dan tanpa tujuan yang jelas, kudanya akan berontak dan akibatnya justru si kuda akan ngambek dan tidak mau lari atau lari sembarangan bukan ke tujuan." 

Kerina orangtua ngarapken gelah min anakna pentar, emaka melala cara ilakoken orangtua guna nehi sura-surana e. Anak si pentar tuhu-tuhu kal jadi keriahen, kehamaten, kesangapen man orangtuana. Kuga ndia iban carana gelah banci min anakta pentar? Adi sipedomani kai si ituriken bahanta wari enda, tempa lit dua hal siertentangen; nina bahanta, orangtua arus mekpek anak i bas ndidiksa ( Indo: pukulan tongkat ), sementara Undang-Undang Perlindungen Anak ngataken maka labo banci ilakoken kekerasen nandangi anak. Kuga enda banci sipersada?

Adi sipelajari isi pesan bahanta enda eme "ngajarken disiplin" nandangi anak. Termasuk pe "pukulan rotan" iertiken sebage gambaren disiplin. Anak si ngelanggar perentah Tuhan arus alu tegas mulai kitik nari, sebab adi lang, banci erbahanca anak e nilah i bas dalan Dibata nari. Banci sibandingken ras anak imam Eli, si la ididikna alu tegas; erbahanca anakna e nggeluh rate-ate seh maka Dibata pe la ia mbiar padahal ia imam. Kinilahamaten anak Eli man Tuhan erbahanca ia mate ( bdk.1 Sam.2 :12-17 ). Ngidah si bagenda rupana me maka penulis kitab Kuan-kuanen ngingetken orangtua gelah disiplin man anak-anakna. Madin me make "tongkat" i bas ndidiksa gelah ia erdalin i bas dalan si benar asangken ia mate ( nggeluh ku dalan kematen ). Nina Martin Luther selain alu tongkat, perlu ka nge isediaken apel guna ibereken man anak tupung ia ngelakoken si mehuli. Pendidiken siilakoken orangtua eme erpalasken perentah Dibata siniipelajarina, alu bage orangtua pe tetap arus erlajar gelah ietehna kai siarus ilakokenna nandangi anakna.

I bas Buku Pengajaran Kristen Fundamental mereken 3 alasen engkai maka orangtua arus ndidik anakna alu tegas eme:
  • Enggo lit biak dosa i bas anak, janah e mabai anak bengket ku dalan si la ngena ate Dibata, emaka orangtua arus ndidik anakna alu tegas.
  • Adi anak la disiplin maka ia erdalan kempak kematen.
  • Ulih anak si nggeluh alu disiplin maka anak e jadi keriahen nandangi orang tua, terkelin i doni ras i surga. 
Muhadjir Effendy eme Menteri Pendidiken dan Budaya ngataken maka pendidiken ras nilai-nilai si mehuli siisuanken nandangi anak arus tegas, tapi ula min seh mekpekisa. Pendidiken tegas si imaksudken eme tutus, ula mis isangkut pautken ras HAM. Ula kari erkiteken alasen keleng ate ras HAM jadina pendidiken man anak e jadi medate la erturi-turin. Ikatakenna maka pendidiken tegas e erbahanca maka anak tahan banting, dingen ngajari ia rukur kerna masa depan. Si terjadi labo erkiteken keleng ate, tapi erkiteken emosi si la terkendaliken orangtua / guru emaka terjadi kekerasen fisik nandangi anak, jenari ibalbali alu la erturi-turin; didiken si enda erbahanca anak la tandaina dirina, turah luka batin, lit ukur guna neruskenca man kalak si deban ( anakna pe pagi bage ka ibanna ).

Alu bage banci siidah maka secara tujun, Pustaka si Badia sendalanen ras pendidiken bagepe HAM Anak. Situhuna kerina aturen e tujunna gelah min anak e banci nggeluh alu disiplin, terarah dingen maksimal. Anak si bagenda me siikataken pentar. Guna banci bage, arus ilakoken pendidiken si tegas si banci mabai ia ku keselamaten i doni ras i surga. Adi bage kuga dage si ban sipayona gelah banci min anakta jadi keriahen man banta erkiteken kepentarenna? Kerna pendidiken anak enda perlu kal kita rukur gelah banci pentar i bas mereken pendidiken man bana. Kita arus leben meteh kuga pentingna pengajaren e, jenari ngajarkenca alu disiplin mulai i bas bertin nari. Adi cara pengajaren e tepat dingen siikuti alu disiplin banci jadl labo kita perlu make "tongkat" i bas ndidiksa. Simekatep jadi, ninta ndidik anakta padahal terjeng merawa-rawa saja erkiteken kesalahen siibahanna. Kurang pengarahen i bas kita nari emaka kenca iteh;" si jahat maka sikataken si benar, tentu talu me kebenaren e. Emaka sibenakenlah ngajari anakta alu disiplin ( la ersungsung ). sibahan pengajaren e teptep wari, banci arah arih-arih bas ngogeken Pustaka, kebaktin i bas jabu. Banci ka nge sibereken pendidiken man anakta arah muat bagin i bas dahin-dahin gereja, sekolah, dahin rumah, ras sidebanna. Mekatep kal kesibukenta Si ban jadi alasenta maka la sididik anakta alu ratur, padahal memang arus kin si litken waktunta guna mereken pendidiken e. Ula kita lupa maka keriahen orangtua eme anakna pentar, emaka mbuelah sibereken perhatianta ku je gelah seh sura-suranta sabab anakta eme si jadi masa depan jabu ras gerejanta.

EVALUASI
Nggo nge sitotoken pelaksanan Pemilu i tengah-tengah negaranta?

DISKUSI :
  1. Kuga nge pendidiken si sedekah enda, silakoken nandangi anak-kempunta? 
  2. Kuga ka ateta pendidiken siilakoken kita man anak-kemputa ku wari si reh enda? 

AKSI :
Banlah sada aksi i bas PJJ nta enda guna HUT KAKR sue ras keperlunna.

USULEN LAGU :
  1. KEE GBKP No. 124 : 2     ( KLIK KEE UNTUK MELIHAT LAGU LANGSUNG )
  2. KEE GBKP No. 482 : 1     ( KLIK KEE UNTUK MELIHAT LAGU LANGSUNG )
  3. KEE GBKP No. 249 : 1,3  ( KLIK KEE UNTUK MELIHAT LAGU LANGSUNG )
  4. KEE GBKP No. 204 : 1     ( KLIK KEE UNTUK MELIHAT LAGU LANGSUNG )

TOPIK PERTOTON SYAFAAT :
  1. Kerina orangtua meteh dingen ndalanken kuga ngajarken kepentaren e nandangi anak-kempuna
  2. Kerina anak GBKP banci ndatken pengajaren kerna kepentaren i bas orangtuana bage kerina kalak si metua nari
  3. Kerina runggun-runggun lebih ermediate nandangi KAKR i bas runggunna gelah teridah kemajun gereja i bas masa si reh enda. 

Pdt. Liza Selvina b. Tarigan, S.Th


0 Response to "Anak Si Pentar Keriahen Orang Tua - Bahan Bimbingen PJJ 7 - 13 April 2019"

Post a Comment

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel